我值得擁有...老公為我而生的幽默(老公妙語分享)

是咁的，老公唔係多言0既人，但係就偏好多時一講野就唔知係想笑你定激死你，亦因為咁，呢幾年黎都有好多笑料。

以前都係笑完就算，但突然覺得呢d好笑野，就算唔同大家分享，都應該記底等自己唔開心果陣睇返都有得笑0下。

而今晚，佢又黎喇：

話說今晚探完長輩病同奶奶食飯，食到幾個都勁飽。搭車返到去，因為想睇雜誌同夠錢抽獎，所以買左甜筒，本來唔應該開，但好自然又開左黎食。

老婆：哎呀，又話飽，依家又0向度食甜筒tim。

老公：唔緊要啦，沖個涼就無左架喇！

老婆：咁你不如話甜品有第二個胃呀！

老公：係囉，胃就兩個，但肚腩就一個囉。

0__0'

唔只咁，到返到屋企，佢又發作喇：

唔知點解，對住鍾意0既人，我會好有想咬佢0既衝動，老公係一定無可能避得過啦。

今晚，我又發牙痕咬佢，佢作狀想咬返我囉。

老婆：你唔會捨得咬我0既。

老公：係呀，你臭0既。

老婆：車，咁你又攬我？！

老公：個身污糟左可以洗嘛，臭0既放左入口就難搞d 喇！

激死我喇！！

講完兩樣笑料，我想講0既其實係，識左呢個男人十幾年，一路佢都係沉默寡言，靜0既程度係會有人覺得佢啞，同埋一間中學讀足5年幾乎無老師記得佢，可以想像佢幾沉靜。

但偏偏，呢個唔多鍾意講野0既人，對住我竟然會變得咁多野講咁好笑，你話我自己讚自己都好，有咁0既改變，係因為我令佢覺得快樂同安心。

人與人之間，好多野係相向。佢愛我，因為我值得愛，同埋我都愛佢；佢發放笑料，因為我值得擁有佢帶畀我0既快樂，同樣地，我都令佢好快樂。



各位姊妹，每個人都值得擁有幸福呢，共勉之。