好開心今次可以試用呢個SHISEIDO MAQuillAGE 最新粉底，從未試過呢個brand 0既粉底，所以好期待，今次好多謝The Ztyle 同SHISEIDO呢！
一向唔多用液狀or cream狀粉底，因為感覺好lup好厚，同埋會好焗同易溶妝咁，雖然近年試多左唔同野都有d改觀，但仲未遇到一隻粉底可以完全合我我心意。
估唔到，今次真係遇到我覺得我會回購0既cream狀粉底，就係Maquillage Moisture Cream Foundation UV，佢今次0既賣點係可以8小時持久保濕同滑，但對我黎講，粉底只係保濕同滑係唔夠架！
咁點先夠？
我比較貪心，除左保濕同滑，我首要夠透薄自然，但要有一定coverage ，跟住要令膚色均勻同明亮，然後仲要控油唔錯，最後當然係要持久啦！差d唔記得講，唔lup係必要條件黎呢！
我咁多要求，估唔到呢隻Moisture Cream Foundation UV都滿足到我，仲令我未用完已經諗定回購囉！
個包裝都幾靚幾華麗呢！
打開入面除左粉底，仲有個匙仔，每一下就係半臉份量，咁就唔駛用手咁核突同唔衛生啦！
其實開蓋之後係有個膜，感覺乾淨衛生呢！
我試呢個係OC10，打開見到好水好滑咁呢！
撕開個膜之後見到個膜有唔少粉底黐住，我呢d 慳家人梗係刮返落樽，淨返果d試埋上手，呢日個妝都係用埋d殘餘架！
試左上手之後，我發現左d問題......
呢幅上手圖唔知大家見唔到有咩問題呢？或者大家先估邊一邊係before，邊一邊係after先啦！
答案係左邊係before，右邊係after，的確，右邊係睇落好滑，青筋都隱哂形，但...個色黃左又深左囉！
我拎之前有去counter 試架，OC00 同10都有，本來想揀00，因為覺得10有d深左，但BA話推左上臉的話00會較白，10就會自然d，我一向都鍾意自然，所以聽佢講揀左OC10，點知一上面對比仲大，即時覺得個色係好黃同深成截囉！不過算啦，我係臉白但身同手都較黑0既，深左少少都仲夾到，但再買我一定會揀返淺色架！
好，唔講廢話啦！入正題！
其實自拎左粉底開始，我每日都係用佢，感覺良好，基本上佢0向冷氣地方咁乾0既環境下絕對做到8小時保濕，但對我黎講咁係未夠架嘛，始終無試過長時間係街會係咩效果，我唔可以未試真就係咁出文架嘛！
終於等到假期，呢日我勁忙，除左要會出入冷氣地方仲會熱、曬同焗，呢隻粉0向咁情況下仲頂唔頂得住呢？
我本身係混合性偏油帶敏感0既皮膚，T字位好易出油，但面頰同鼻翼位有時會乾，為左認真測試0下佢，我連控油base同碎粉都無用，單用佢去出足成日街，大家可以睇0下試用效果係點啦！
Cream foundation 黎講，上臉之後第一下覺得佢無我感覺上咁好推，但第二下就已經好smooth，又真係唔乾，同埋都好貼，而且望落好似好滑呢！但可能我好少用cream，同埋呢隻講明for 秋冬，都有一下覺得會潤左d，但推好哂過幾分鐘就會無左呢個感覺，唔上碎粉都唔會lup呢！
遮瑕度黎講，好薄咁用手推開左一層粉，大部分紅印痘印都遮左7、8成，泛紅情況亦修飾左好多，以佢咁薄黎講個coverage 我覺得滿意，呢排勁攰同大壓力，訓得好差，所以眼圈分別最明顯，大家睇落d 就會知有幾大差距。
不過可能OC10呢個色號對我黎講真係偏黃左同深左，上粉之後個臉色深沉左同唔夠白淨，好左呢個cream 無暗啞0既情況，襯返頸同身都仲算自然。
呢張係上妝大約5、6個鐘後，去完補習，食完lunch，仲經過烈日當空曬住同勁焗環境下睇左兩個幾鐘樓，都無曬到出乾紋，仲估唔到無落碎粉都無點出油，係鼻位有d令令地，同埋個妝開始dd甩色，可以見到d瘡同紅印有d現形，見到有d毛孔，但整睇仲唔錯幾滑淨。
再夜d喇，個妝己經化左8個鐘。睇完一輪樓之後又過埋cwb，咁熱之下等完一輪小巴，見到瘡出哂黎啦，下巴d印都出返黎喇，眼圈直頭同無遮無乜分別，但都咁長時間，又出過汗又出左d油，印過臉又無補妝下，keep到咁都算唔錯啦！
總括黎講，佢真係做到長時間保濕同埋keep到幼滑感，而佢其他各方面表現都算幾好，都幾夾到我0既膚質。唯一0既問題係佢呢個系列都偏黃，下次我會用最淺0既色，希望可以做到更透亮0既效果啦！
我其實依家苦惱緊，好唔好買埋00返黎溝黎用好呢？
沒有留言:
張貼留言