南丫島之旅 Day 2

五點先入房訓，可惜係有聲音打擾，勁耐都未訓得著，最慘係隔離果個勁快訓到豬咁。

終於好辛苦先訓得著，但無耐又有人已經醒左仲要整好多聲出黎，勁無奈，終於碌左輪頂唔順喇，八點左右就起左身整野囉！！！

其他人都唔好得我幾多，都係訓唔好所以陸陸續續出左房整野喇！

大家梳洗完臨走前又影下相咁囉！！

跟住有d人走先，我地淨返果d就繼續行，去左食豆腐花但唔記得影相。



咁咁眼訓去行山真係唔係講玩，幾經辛苦先行到上去風車發電站咋！！不過望見眼前美景，同清新空氣，都會覺得好值得！！

咁辛苦上到去當然要影下相啦！！！

跟住我地仲行埋上山上果亭，果度望落去又另有一返風味，可惜係我太眼訓喇，都無乜心機影相同欣賞風景囉！

勁死撐先撐得開對眼咋！！

影埋呢幾張相，我地就落返去食野喇！！

等食中0既我眼訓到幾乎坐0向度訓著，都無乜心機同大家講野，就連食都不知其味咁滯，無電呀！

飯後大家都帶住疲累0既身軀去搭船，好多仲一上船已經訓死左，我當然唔例外，去果陣暈船浪暈到嘔兼猛叫救命同叫要落船0既我，回程呢次終於無事喇，因為我未開船已經失去左意識，直至落船先醒囉！！哈！

同老公行左去信德果邊搭巴士，貪佢有得坐可以訓下，又係上車訓到落車，勁！！無計，我不嬲係個貪睡寶寶，要訓勁多先得架嘛！夜訓已經死，今次仲幾乎通頂，點會唔訓死左呀！

雖然真係好疲累，但可以同大班朋友bbq、玩大富翁，講0下笑0下，又可以行0下山呼吸0下新鮮空氣，其實都真係幾relax又開心，我覺得開心過兩個人過節呢！！！