回到少年時

今日上完跳舞之後，Cathy 陪我落左旺角拎野兼買野，當然，少不了行下街啦！

我提議去睇下上次影果部貼紙相機整好未，上次想同老公去影點知佢維修囉！勁灰！

點知 . . . 今次仲灰，部機已經無左喇！！！嗚！！好好玩架嘛！仲要10蚊，邊度再搵到咁荀？

不過一場去度，點都會影0既！原位轉左部廿蚊閃粉貼紙相機，我地咪又試下囉！！影出黎幾靚，但畫野時間太短喇！

記得好耐之前都影過類似，果時我地成班成日一齊去影架！！！呢部野都真係classic 款黎架喇！！

以為果部已經夠經典，轉頭見到有部機勁多人影，仲要係十蚊，我地又想試試喇！！不過太多人，所以行完瓊華先再影過！

嘩，原來呢部仲經典呀，係有張凳仔要企高影、個位勁迫，仲無得畫野果隻呢！！真係好似返到細個讀書果陣時呀！好懷念呀！！

太耐無影呢d，部野又勁快，第一次果陣影得勁差，第二次好好多喇！！諗返起，我同Cathy已經識左七、八年，時間過得真快！！好懷念過去柴娃娃0既日子呢！

呢張就係無得再影0既十蚊雞貼紙相，勁抵，影得靚之餘多野玩，仲要勁長時間畫野囉！！好可惜無得影喇！！希望再搵到呢部野啦！！