發燒

其實由上星期二開始已經作病，尋日朝喉嚨更係火燒咁，好彩下晝好返d喇，尋晚又難得齊人，當然出左去先算。

返到屋企就知賴野，係咁咳又頭痛，半夜開始仲發冷又發滾，又喪冒汗，醒左成幾十次，去廁所果陣照鏡見到自己全臉同眼都紅哂，全身火燒咁但又覺得勁凍，唉，又發燒喇！！

全晚都覺得個人好辛苦，全身都痛，特別係肩膊、手臂、腰同頭，痛到幾乎郁唔到，今朝九點幾終於等到老公返黎，扶我起身食多次藥，仲陪我沖個涼（因為我驚自己沖會暈低）。佢今日約左人踩電單，佢想唔去架喇，我唔想佢因為我無得去做運動，所以叫佢買埋野食畀我就可以出去，累佢班朋友等佢成個鐘，真係唔好意思。

沖左涼都仲係係咁出汗，迷迷糊糊訓0下醒0下，到後來醒左食埋野食埋藥就訓唔返，不過好彩無再繼續勁出汗，同埋終於退左熱喇。只係個人仲係好痛好散，希望訓埋今晚會無事啦！

本來今日應該係同Cathy上現代舞，之後仲約左Amy食tea，跟手再同老公行街食飯，就因為突然發燒搞到邊度都無得去喇，慘！