長洲，我來了！（一）

尋日下晝拎左半日AL，補埋習執好野就出發去中環，因為我要去長洲呀！！

本來呢個trip 係約左d 朋友仔架，但點知被人甩哂底，一個無覆又無聽電話，一個病左，仲有一個因為大家都唔去唔想做燈膽又唔肯去，最終淨返我地兩公婆去囉！

初頭因為咁我真係有d 灰架，本來一心諗住三五好友去BBQ0下，玩下大富翁、UNO，同埋傾0下偈架嘛，點知最後個個都唔去，唉！

但後來我都接受左，咪當兩口子去渡假relax0下囉，最無奈係要兩個人住一間3層3房兩廳0既屋囉，但要畀錢架嘛，唔通唔去咩？！

既然大局已定，唯有用開開心心0既心情去啦，係咪？

果日我同老公大約下晝5點幾會合，就開始出發去長洲喇！長洲，我黎喇！

去碼頭途中見到呢架富豪雪糕車，係roxy 架！！勁sharp！！

等船果陣見到呢個模型，見有時間就同佢影張相啦！

半個鐘頭船真係好快，天未黑我地就入到長洲喇，第一步當然係去拎匙放低行李先啦！

途中見到勁大粒0既魚蛋，足有乒乓球咁大，又有d餓，就買黎食下啦！（但點解影出黎影到個效果架？！真係失敗呀！！)

一路行個太陽一路落，黃昏0既天色真係最靚0既呢！

由於我地唔太識路，搞左大輪先搵到間屋，過程勁艱巨，都無謂再提，但有樣野不得不發洩一下，就係我地去到拎匙果處，明明寫明1pm-8pm 都可以拎匙，點知個電話無人聽囉，足足等左四、五個字，先有人聽，原來果個人負責人已經返左屋企，要我地自己去拎完之後先做返登記囉，仲話我地遲入黎囉，果下我真係過火屎，佢自己未夠鐘走左去仲賴我地？！！難為我呀，已經攰架喇，果度仲荒山野嶺，又熱又多蚊又多跳跳下果d野，仲要天黑埋，等左咁耐都無人聽我幾驚今晚唔知點算，點知佢咁囉！爆嬲呀！

天色又黑哂，我地都唔敢拖時間喇，一放好d野就即刻落去搵野食。

我黎之前已經做過research，諗住搵返我記低0既果d食肆dinner，點知老公漏掉左我寫果張紙呀！！救命！！

搵野食0既途中見到一間我有mark 低0既cake shop ，見有d餓，就先買兩件cake 食住先喇！上面0既係豆腐芝士蛋糕，好香豆腐味；下面係益力多芝士奶凍，呢個勁yummy，入面仲有椰果，正！兩件加埋30蚊，仲要唔算細件，抵啦！重點係，果個老闆好得意好nice，仲好努力教我去搵果間我想去0既餐廳（雖然佢唔太識，哈！）

終於去到呢間餐廳，聽聞好好食架！不過入去係無人serve架，因為老闆煮緊野畀客，要自己同個老闆講你想叫野食，佢先會理你架！

等食期間都係影0下相喇，呢度d 掛畫好有民族色彩，我地一路睇住電視一路等，好有屋企feel呢！！

呢兩杯野勁似樣，其實一杯係荔枝椰果冰，一杯係紅毛丹椰果冰，大家分唔分到邊杯打邊杯呢？

呢個印尼撈麵好好味架，係咸少少囉，不過只係2x蚊但勁大碟囉！！

呢個印尼炒飯仲正，又香又乾爽又夠軟，good！！

呢個栗米蝦餅好脆好香口，但略咸囉！

總括間野其實都唔錯，佢門口仲有蝦片同糕點賣架，不過今次我地臨走前唔記得買，希望下次再去買到啦！！