八號風球迎生日

仲有唔夠半個鐘就係我生日喇，今日睇天氣報告知道好大機會改掛三號已經勁唔開心，因為咁代表我生日好可能會係大風大雨中渡過，我一向係天氣唔好心情亦會唔好0既人，如果真係生日打風我又點會開心呢。

估唔到夜晚收到更令人無奈0既消息，就係可能會改掛更高0既風球，之前我話老公好似無乜表示，今晚同奶奶食飯之前我再問佢，佢話有都無用啦，打八號都唔開，有都無得拎無得送啦。果下真係灰到爆囉，超唔想打八號囉。

雖然心情唔好，但今晚奶奶請我食飯都食得幾開心，叫做無咁低沉囉。而老公亦因為知道會打風，所以改左原定計劃，趁我去洗手間果陣去拎蛋糕先，驚聽日打風唔開又或者大風大雨難出去拎，我去完洗手間唔見左佢，見佢原來入左哈根大師，仲有個店員咁0岩拎個蛋糕出黎果下，我其實係幾感動，係我勁喜歡0既百利甜酒味雪糕蛋糕呢。

走果陣知道十一點會掛八號，我不由自主地想喊囉，果下唯一諗到就係：生日先黎掛八號，唔同連個天都唔鍾意我？

講到返工，我地唔係落波後兩個鐘內計架，總之一落八號又要即刻飛返去，就算返到去打完咭夠鐘收工都要照返，話就話近，但行都要差唔多半個鐘，大風大雨又水浸難行，搭車又會勁塞，就算安全返到去都濕哂啦，又吹完風唔病有鬼，諗起就灰爆。唯有寄望聽朝起身個八號已經落左啦，唔係我肯定忍唔住喊都似，唉！

點解生日先黎打風架？？？