Lokmochi Mamiba

尋晚去睇左《Lokmochi Mamiba》，今年佢地第一年作公開發售，亦係我第一年睇，本來以為已知無得睇架喇，事關買唔到飛又換唔到飛，但又唔想助長黃牛，所以幾乎放棄左架喇。
皇天不負有心人，竟然最後關頭見到有人用原價出讓兩張280蚊0既連位飛，仲要咁0岩我老公果晚得閒，當然即刻發問留言話要啦，但我呢頭問完，果頭已經唔見左個拍賣喇，當我以為無望之際，就0向第朝開email 果陣見到個賣家留低聯絡方法叫我搵佢喇，打去約時間交收，仲驚要出到好遠先拎到，點知個賣家都係沙田友，仲就到可以拎埋去大圍站俾我，勁開心，真係即時覺得自己好好彩呢！
第二日見到個賣家，佢仲勁開心我幫佢買左兩張飛，因為佢臨時要出trip去唔到睇，所以張飛就無用喇，佢自己就買左29號晚0既黃牛，佢無意炒賣，只係想讓左佢唔想用成千幾蚊睇個show。真係好喇，我睇到我想睇0既show，佢賣到佢多餘0既飛，yeah！！
show 之前同老公去左食壽司，食完就慢慢行過去喇，入場前去左洗手間，一入去就聽到佢廣播話三分鐘後開始，去完出黎果陣老公話幾驚我趕唔切，哈哈，點會趕唔切，傻瓜。
我地果位都唔錯呀，睇得都幾清楚，熄燈前仲見到方友申同王苑之一齊黎呢。
呢次個show都幾好睇，勁多gag，好多都好搞笑好精警，睇得出係認真度過0既，成個表演無疑係貪心左，又做呢樣又做果樣，變左未必樣樣都做得好好，但感覺上係有用心0既，又做大戲、又歌劇、又武術，其實各台前幕後都要付出好大努力。到尾段唱主題曲果度真係好震撼，成個場景好好睇，睇到呢幕覺得成首歌同個劇真係好配合，好有果種感覺，睇到我都有d 感動。
成個劇要講的話真係有排都講唔完，希望有機會出碟，可以回味一番。
最後值得一提係，森美同小儀咀果幕真係好怪，好笑得黎感覺真係好怪呀！！！！雖然果幕佢地咀都好合理好配合劇情同應該係好溫馨，但唔知點解真係覺得好奇怪呀，好亂倫feel 呀！