雖然26號先補祝返6號0既生日係遲0左d，但Helen 0既生日點都係要慶祝0下架嘛！上星期六落狗屎咁迫住cancel，都知道Helen 好唔開心，今次大家瞞住佢，換個場地再黎，俾個surprise 佢，最重要係佢開心啦！
仲記得n年前0既紀念冊事件，今次Helen 好叻無喊喇，佢話因為我喎，唔想再0向我面前喊喎，傻瓜，感動到喊又有乜所謂呢！但當然，我希望你永遠都好似呢晚咁開開心心，仲有健健康康，越來越靚，遇到個你愛佢佢更愛你0既超級好男人！！！我真係好想好想見到你幸福0架！！！
今晚活動係咩其實都唔係重點，最重要係我地TC Club 眾人又可以聚首，玩0下笑0下分享0下。咁多年喇，大家都成長0左，再唔係乜都笑得一餐0既靚妹，大家都開始有各自己煩惱，要面對唔同0既選擇，大家可以共聚0既時間亦越來越少，難得係大家都願意出心出力去維繫呢份友情。
我選擇0既路同大家所揀0既，似乎真係好唔同，但無辦法，我無得揀，我唔奢望你地會明白，始終有d 0野係一言難盡，更何況我從來唔係鍾意訴心事0既人。而且，對住你地，我想每一分每一秒都係過得開心高興的。睇住你地每個都為事業前途努力，而且開始有所成績，我雖然遙遙落後，但仍然為你地覺得高興，你地要繼續加油呀！！
一直以來，對於Helen 同阿Cat，都係比較偏心，唔係唔愛其他TC 友，只係佢地都有特別原因令我覺得要愛佢地多d。先唔講阿Cat，講返Helen，佢其實真係一個好得人鍾意0既人，至少對我0黎講係囉。我地平時睇佢，好似係crazy好癲咁，其實佢只係大情大性；佢對人0既熱情亦唔係表面，佢係真係一個好重感情、好有情有義0既人；睇佢好似粗粗魯魯、聲大大咁，硬係好似d 大家姐好豪氣咁，其實佢真係，我覺得佢真係可以做到義字行頭果種feel 0架；但其實佢又係一個好感性好易滿足0既人，好容易就感動，好容易就為人地對佢做0既0野而開心而感激；而且佢雖然好似好傻氣，成日俾人笑俾人蝦都無乜0野仲好開心咁，其實只係佢個人無所謂，但如果click 到佢0既底線，佢實同你據理力爭，因為佢都係一個好有原則好有主見0既人；仲有就係，其實佢都幾溫柔幾細心的，睇對咩人咁解0者。
Helen 其實帶俾佢身邊0既人好多歡樂好多溫暖，佢唔同Carman,Gigi,Amanda，佢地係d 比較含蓄0既人，但Helen 就係好直接表達自己感受0既人，雖然人大0左點都會有d 改變，唔會再好似讀書果陣咁喜惡形於色，但佢0既真，我諗係呢世都唔會改變0架，呢個其實亦係佢其中一個吸引人0既地方。
朋友，我知道人大0左要面對0既0野多0左好多，總會有難過唔開心0既，但請你記住保持你果份真誠果份開朗，因為滿臉笑容0既你係最吸引0架！
做到佢朋友，真係好幸福，我諗邊個做著佢男朋友，就真係執到寶啦，佢肯定會照顧周到呢！
Helen，I always love you！！All TC member,l always love you too！！TC Club forever！！Yeah！！
聚會尾聲當然唔少得大合照啦！
我地都好多好0野食呢~~
好多人都話我同Helen 似樣，所以我地每次gathering 都一定會擺好pose影張twins 相，唔知點解呢張可以影到我全身最無肉0既腳咁肥呢，哈哈~~
沒有留言:
張貼留言